Waghih Datang Menyorah.

Assalamualaikum!~

Manusio mati meninggalkan namo, kalu binatang mati?? Ekau caghi la jawapan sendiri eh, maleh den nak jawabkan. Ponek den tak ilang layi dek kerano momburu impian geng yang borani pocah masuk umah den kelmarin. Apo??? Ekau tak tengok beghito ko? Bukan tengok kek tibiiiiii...tengok kek {SINI}.

Beriyo bonar wartawan tu soal ko den. Macam-macam dio tanyo hehe. Dah kalau ari-ari 'dio' buek tak boto dalam umah den, mau tak paneh! Den pulak kono sapu sampah-sampah 'dio'..banyakkkkkk cantek!!!

Logo la den ghaso sokarang, geng tu dah takdo layi. Habih sumo tompek dio main den komehkan. Den buang mano yang tak guno, den susun cantik-cantik. Den cuci ngan sabun den lap pulak lopeh tu. Tak ko ponek tu? Tapi, den lagi ponek kalau esok dio tinggalkan ponyakit kek kuargo den. Ponek nak carik ubek pulak!

Dan, pagi tadi den bukak pintu bilik kocik tu.....

Laaa ghupo eh tikuh somalam yang last den dapek tu tikuh betino. Kocik bobonar eh waghih 'dio' ni. Ado la bosar duit syiling duo pusen ha. Mulo-mulo den ingatkan taik tikuh setompok kecil coklat itam-itam. Tapi, takdo pulak bau taik eh bau darah eh bau busuk eh. Elok jo bilik tu den nengok. Sompek jugak 'dio' meninggalkan waghih yo.

Den kalu tikuh bosar tu den tak dayo nak ligan sorang-sorang do. Kalau kocik begini den berani la. Den poyi amik tisu kek dapur, den angkek 'waghih' den lotak dalam plastik sampah. 

Kakak pun tanyo....

"bu...bu buang ke anak tikus tu?"

"yo..dah buang"

"tak berdosa ke buang anak tikus bu?"

"buang anak tikuh takpo, pasal dio buleh bagi penyakit kek kito. Yang berdoso tu buang anak manusio"